കുമ്പസാരത്തെ സമൂഹ മധ്യത്തില്‍ അവഹേളിക്കാന്‍ സംഘടിത ശ്രമം; ബിഷപ് ഡോ.വിന്‍സെന്റ്‌ സാമുവല്‍
കുമ്പസാരത്തെ സമൂഹ മധ്യത്തില്‍ അവഹേളിക്കാന്‍ സംഘടിത ശ്രമം; ബിഷപ് ഡോ.വിന്‍സെന്റ്‌ സാമുവല്‍
അനിൽ ജോസഫ്
നെയ്യാറ്റിന്‍കര: കത്തോലിക്കാ സഭയും വിശ്വാസികളും പരിപാവനവും വിശുദ്ധവുമായി കാണുന്ന കുമ്പസാരത്തെ സമൂഹമധ്യത്തില്‍ അവഹേളിക്കാന്‍ സംഘടിതമായി ശ്രമം നടക്കുന്നതായി നെയ്യാറ്റിന്‍കര ലത്തീന്‍ രൂപതാ ബിഷപ് ഡോ.വിന്‍സെന്റ്‌ സാമുവല്‍ പറഞ്ഞു. കുമ്പസാരമെന്ന കൂദാശയെക്കുറിച്ചുളള അജ്‌ഞതയാണ്‌ ദേശീയ വനിതാ കമ്മിഷന്‍ അധ്യക്ഷയെകൊണ്ട്‌ വിലകുറഞ്ഞ പരാമര്‍ശത്തിന്‌ ഇടയാക്കിയതെന്നും ബിഷപ് കൂട്ടിച്ചേര്‍ത്തു.
കത്തോലിക്കാ സഭയെ താറടിച്ച്‌ കാണിക്കാനുളള കേന്ദ്രസര്‍ക്കാരിന്റെ നിഗൂഡമായ അജണ്ടയുടെ ഭാഗമാണ്‌ കുമ്പസാരത്തോടുളള വിവാദ പരാമര്‍ശമെന്ന്‌ കേരളാ ലാറ്റിന്‍കന്‍ കാത്തലിക്‌ അസോസിയേഷന്‍ രൂപതാ സമിതി അഭിപ്രായപെട്ടു.
നെയ്യാറ്റിന്‍കര ബിഷപ്‌സ്‌ ഹൗസില്‍ ചേര്‍ന്ന യേഗം ബിഷപ് ഡോ.വിന്‍സെന്റ്‌ സാമുവല്‍ ഉദ്‌ഘാടനം ചെയ്‌തു. പ്രതിഷേധ യോഗത്തില്‍ വികാരി ജനറല്‍ മോണ്‍. ജി. ക്രിസ്‌തുദാസ്‌ അധ്യക്ഷത വഹിച്ചു. ചാന്‍സിലര്‍ ഡോ.ജോസ് റാഫേല്‍, ജുഡിഷ്യല്‍ വികാര്‍ ഡോ. സെല്‍വരാജന്‍, കെ.എൽ.സി.എ. പ്രസിഡന്റ്‌ അഡ്വ. ഡി.രാജു, പാസ്റ്ററല്‍ കൗണ്‍സില്‍ സെക്രട്ടറി ആറ്റുപുറം നേശന്‍, കെ.എൽ.സി.ഡബ്ല്യൂ.എ. സംസ്‌ഥാന ജനറല്‍ സെക്രട്ടറി അല്‍ഫോസ തുടങ്ങിയവര്‍ പ്രസംഗിച്ചു.
