ഉണ്ടന്‍കോട്‌: 8- ാമത്‌ കുരിശുമല ബൈബിൾ കൺവെൻഷന് ഇന്ന്‌ വൈകിട്ട്‌ തുടക്കമാവും. കൺവെൻഷന്റെ ഭാഗമായി നാളെ വൈകിട്ട്‌ നടക്കുന്ന സമൂഹ ദിവ്യബലിക്ക്‌ നെയ്യാറ്റിന്‍കര രൂപതാ വികാരി ജനറൽ മോൺ. ജി. ക്രിസ്‌തുദാസ്‌ മുഖ്യകാർമ്മികത്വം വഹിക്കും.
5 ദിവസങ്ങളിലായി നടക്കുന്ന ബൈബിൾ കൺവെൻഷന് പോട്ട ഡിവൈൻ ധ്യാന കേന്ദ്രത്തിലെ പ്രസിദ്ധനായ ധ്യാന ഗുരു ആന്റണി പയ്യംപളളി നേതൃത്വം നൽകും.
വ്യാഴാഴ്‌ച വൈകിട്ട്‌ മലങ്കര ക്രമത്തിൽ നടക്കുന്ന ദിവ്യബലിക്ക്‌ പനച്ചമൂട്‌ പുത്തൻപളളി ഇടവക വികാരി ഫാ. പോൾ വിളയിൽ പുത്തൻവീട്ടിൽ നേതൃത്വം നൽകും. വെളളിയാഴ്‌ച തമിഴ്‌ ഭാഷയിൽ നടക്കുന്ന ദിവ്യബലിക്ക്‌ പുത്തൻകട ഫൊറോന വികാരി ഫാ. ബെന്നിലൂക്കോസ്‌ മുഖ്യ കാർമികനാവും. ശനിയാഴ്‌ച വൈകിട്ട്‌ സീറോമലബാർ ക്രമത്തിൽ നടക്കുന്ന ദിവ്യബലിക്ക്‌ നെട്ട സെന്റ്‌ തോമസ്‌ ഇടവക വികാരി ഫാ. ഡേവിഡ്‌ മുഖ്യ കാർമ്മികനാവും.
സമാപന ദിവസം കാട്ടാക്കട റീജിയൻ കോ ഓർഡിനേറ്ററും കുരിശുമല ഡയറക്‌റ്ററുമായ മോൺ. വിൻസെന്റ് കെ. പീറ്ററിന്റെ മുഖ്യ കാർമ്മികത്വത്തിൽ ദിവ്യബലി നടക്കും. എല്ലാ ദിവസവും ദിവ്യബലിയെ തുടർന്നാണ് ജീവിത നവികരണ ധ്യാനം ക്രമീകരിച്ചിരിക്കുന്നത്.
