ജോസ് മാർട്ടിൻ
കണ്ണൂർ: കെ.ആർ.എൽ.സി.സി. മുൻ അംഗവും ലത്തീൻ കത്തോലിക്ക സമുദായത്തിന്റെ മുഖപത്രമായ ജീവനാദത്തിന്റെ ഉടമസ്ഥാവകാശമുള്ള ലാറ്റിൻ കാത്തലിക് ചാരിറ്റബിൾ ട്രസ്റ്റ് അംഗവുമായ കെ.എസ്. മർക്കോസ് നിര്യാതനായി. കോഴിക്കോട് സ്വകാര്യ ആശുപത്രിയിലായിരുന്നു അന്ത്യം, 58 വയസായിരുന്നു.
തലശ്ശേരി സെന്റ് ജോസഫ് ഹയർ സെക്കണ്ടറി സ്കൂൾ പ്രിൻസിപ്പലായിരുന്നു. CLC യുടെ ദേശീയ സീനിയർ വൈസ് പ്രസിഡന്റ്, ദേശീയ യൂത്ത് വൈസ് പ്രസിഡന്റ്, ദേശീയ കൺസൾട്ടന്റ്, KRLCC വിദ്യഭ്യാസ കമ്മീഷൻ അംഗം എന്നീ നിലകളിൽ പ്രവർത്തിച്ചിട്ടുണ്ട്. മുപ്പത്ത് വർഷത്തിലേറെ മതാധ്യാപകനായി പ്രവർത്തിച്ചുവരികയായിരുന്നു, കൂടാതെ ഇടവക ഗായക സംഘത്തിലും അംഗമായിരുന്നു.
1990-ൽ മെക്സികോയിൽ വച്ചു നടന്ന വേൾഡ് CLC അസംബ്ലിയിൽ മർക്കോസ് മാഷ് ഇന്ത്യയെ പ്രതിനിധീകരിച്ചിരുന്നു. കണ്ണൂർ രൂപതയിലെ താവം ഇടവകയിലാണ് ജനനം. വാഗ്മിയും യുവജന പരിശീലകനുമായ മർക്കോസ് മാഷിന്റെ നിര്യാണത്തിൽ KRLCC സെക്രട്ടറിയേറ്റ് അനുശോചിച്ചു.
