കോട്ടപ്പുറം രൂപതയിലെ സീനിയര്‍ വൈദികൻ ഫാ.പോള്‍ മാബ്ര നിര്യാതനായി
24ന് ശനിയാഴ്ച വൈകീട്ട് 4 മണിക്ക് കോട്ടുവള്ളി സെന്റ് സെബാസ്ത്യൻസ് ദേവാലയത്തില്‍ വച്ച് സംസ്കാര ശുശ്രൂഷകൾ
സ്വന്തം ലേഖകൻ
കൊടുങ്ങല്ലൂര്‍: കോട്ടപ്പുറം രൂപതയിലെ സീനിയര്‍ വൈദികനായ ഫാ.പോള്‍ മാബ്ര നിര്യാതനായി 83 വയസായിരുന്നു. സംസ്‌കാരശുശ്രൂഷകള്‍ 24ന് ശനിയാഴ്ച വൈകീട്ട് 3 മണിക്ക് അച്ചന്റെ സഹോദരന്‍ ജോസഫിന്റെ കോട്ടുവള്ളിയിലുള്ള വസതിയില്‍ ആരംഭിക്കും. തുടർന്ന്, 4 മണിക്ക് കോട്ടുവള്ളി സെന്റ് സെബാസ്ത്യൻസ് ദേവാലയത്തില്‍ വച്ച് നടക്കുന്ന സംസ്കാര ശുശ്രൂഷകൾക്ക് ബിഷപ്പ് ജോസഫ് കാരിക്കശേരി മുഖ്യകാര്‍മികത്വം നൽകും.
1963 മാര്‍ച്ച് 19ന് വരാപ്പുഴ അതിരൂപത ആര്‍ച്ച്ബിഷപ്പ് ജോസഫ് അട്ടിപ്പേറ്റിയില്‍ നിന്ന് പൗരോഹിത്യം സ്വീകരിച്ചു.
വല്ലാര്‍പാടം പരിശുദ്ധാരൂപിയുടെ ബസിലിക്ക, പള്ളിപ്പുറം മഞ്ഞുമാതാ ബസിലിക്കകളിലും; കുഞ്ഞിത്തൈ സെന്റ് ഫ്രാന്‍സിസ് സേവ്യര്‍, കാര മൗണ്ട് കാര്‍മല്‍, വടുതല സെന്റ് ആന്റണീസ്, ഓച്ചന്തുരുത്ത് ക്രൂസ് മിലാഗ്രിസ്, മൂത്തേടം സെന്റ് മേരി മാഗ്ദലിന്‍, ചാത്തനാട് സെന്റ് വിന്സെന്റ് ഫെറര്‍, തുരുത്തൂര്‍ സെന്റ് തോമസ്, ചെറുവൈപ്പ് അമലോത്ഭവമാതാ, അരിപ്പാലം സേക്രഡ് ഹാര്‍ട്ട്, എറിയാട് ഫാത്തിമമാതാ തുടങ്ങിയ ഇടവകകളില്‍ വികാരിയായും സേവനം ചെയ്തിട്ടുണ്ട്. കൂടാതെ, മൂത്തേടം പി.എസ്.ഹോസ്പിറ്റല്‍ ഡയറക്ടറായും സേവനമനുഷ്‌ടിച്ചിട്ടുണ്ട്.
2011 മുതല്‍ വടക്കന്‍പറവൂര്‍ ജൂബിലിഹോമില്‍ വിശ്രമജീവിതത്തിലായിരുന്നു.
കോട്ടുവള്ളി പരേതരായ മാബ്ര വര്‍ക്കിയും, മറിയവുമാണ് മാതാപിതാക്കള്‍. ജോസഫ്, മൈക്കിള്‍, പരേതരായ ബ്രിജിത്ത, കൊച്ചുമറിയം, ദേവസി, ആന്റണി എന്നിവര്‍ സഹോദരങ്ങളാണ്.
