സ്വന്തം ലേഖകൻ
ബാലരാമപുരം: നെയ്യാറ്റിൻകര രൂപതയുടെ തീർത്ഥാടന ദേവാലയമായ കമുകിൻകോട്‌ അന്തോണീസ്‌ ദേവാലയത്തിൽ ഗ്രീൻ കൊച്ചുപളളി പദ്ധതിക്ക്‌ തുടക്കമായി. പദ്ധതിയുടെ ഭാഗമായി പതിനായിരം വൃക്ഷതൈകൾ ഇടവകയിലെ 750 കുടുബങ്ങളിലും ചൊവ്വാഴ്‌ചകളിൽ കൊച്ചുപളളിയിലെത്തുന്ന തീർത്ഥാടകരിലും എത്തിക്കുകയാണ്‌ ലക്ഷ്യമെന്ന്‌ ഇടവക വികാരി ഫാ. ജോയിമത്യാസ്‌ പറഞ്ഞു.
കൂടാതെ കൊച്ചുപളളി തീർത്ഥാടന കേന്ദ്രവും പരിസരവും പ്ലാസ്റ്റിക്‌ നിർമ്മാർജ്ജന ശുചീകരണ പ്രവർത്തനങ്ങൾക്കും തുടക്കമായി. എല്ലാ ചൊവ്വാഴ്‌ചകളിലും കൊച്ചുപളളിയിൽ 25 ‘ഗ്രീൻ പ്രോട്ടോക്കോൾ വോളന്റിയേഴ്‌സ്‌’ പദ്ധതിയുടെ തുടർ പ്രവർത്തനങ്ങൾക്ക്‌ നേതൃത്വം നൽകും.
പദ്ധതിയുടെ ഭാഗമായുളള വൃക്ഷതൈകളുടെ വിതരണം അതിയന്നൂർ പഞ്ചായത്ത്‌ പ്രസിഡന്റ്‌ ബി. ടി. ബീന തീർത്ഥാടകർക്ക്‌ നൽകികൊണ്ട്‌ ഉദ്‌ഘാടനം ചെയ്യ്‌തു. ഇടവക വികാരി ഫാ. ജോയി മത്യാസ്‌ അധ്യക്ഷത വഹിച്ചു. കൗൺസിൽ സെക്രട്ടറി ആനന്ദകുട്ടൻ, എൽ.സി.വൈ.എം. പ്രസിഡന്റ്‌ ഇഗ്‌നേഷ്യസ്‌, വൈസ്‌ പ്രസിഡന്റ്‌ കരുണാകരൻ, കോ- ഓർഡിനേറ്റർ ജോൺ, അകൗണ്ടന്റ്‌ ഭദ്രകുമാർ തുടങ്ങിയവർ പങ്കെടുത്തു.
