ജോസ് മാർട്ടിൻ

ഗുഡ്ഗാവ്: മലങ്കര സുറിയാനി കത്തോലിക്കാ സഭയുടെ ഗുഡ്ഗാവ് ഭദ്രാസന പ്രഥമ അദ്ധ്യക്ഷൻ അഭിവന്ദ്യ ജേക്കബ് മാർ ബർണബാസ് പിതാവ് കാലം ചെയ്തു. ഇന്ന് ഉച്ചയ്ക്ക് -12:50 നായിരുന്നു അന്ത്യം. ഏറെ നാളുകളായി രോഗബാധിതനായി ചികിത്സയിലായിരുന്നു. കബറടക്ക ശുശ്രൂഷകൾ ഓഗസ്റ്റ് 29 ഞായറാഴ്ച്ച ഡൽഹിയിൽ നടക്കും.

മലങ്കര സുറിയാനി കത്തോലിക്കാസഭയുടെ എപ്പിസ്കോപ്പൽ സൂന്നഹദോസ് സെക്രട്ടറിയും, തിരുവല്ലാ അതിഭദ്രാസനത്തിന്റെ മെത്രാപ്പോലീത്തൻ ആർച്ച് ബിഷപ്പ് അഭിവന്ദ്യ തോമസ് മാർ കൂറിലോസിന്റെയും മുഖ്യ കാർമ്മികത്വത്തിലായിരിക്കും സംസ്ക്കാരകർമ്മങ്ങൾ നടത്തപ്പെടുകയെന്ന് മലങ്കര സുറിയാനി കത്തോലിക്കാ സഭയുടെ മേജർ ആർച്ച് ബിഷപ്പ് കാതോലിക്കോസ് കർദ്ദിനാൾ ബസേലിയോസ് ക്ലീമീസ് ബാവാ അറിയിച്ചു.

പൊതു ജനങ്ങൾക്ക് ഭൗതികശരീരം ദർശിച്ച് ആദരാഞ്ജലികൾ അർപ്പിക്കുന്നതിനും പ്രാർത്ഥിക്കുന്നതിനും ഓഗസ്റ്റ് 27 വെള്ളിയാഴ്ച്ച രാവിലെ 8 മുതൽ ഡൽഹി-നെബ്സറായ് സെന്റ് മേരീസ് കത്തീഡ്രലിൽ അവസരമുണ്ടായിരിക്കുന്നതാണ്.

2015-ൽ ഗുഡ്ഗാവ് രൂപതാ അധ്യക്ഷനായി മാർ ബർണബാസ് പിതാവ് ചുമതലയേറ്റ ശേഷം ഒട്ടനവധി ജീവകാരുണ്യ പ്രവർത്തനങ്ങൾക്ക് പിതാവ് നേതൃത്വം നൽകിയിട്ടുണ്ട്.