ജോസ് മാർട്ടിൻ

ആലപ്പുഴ: ഭാരത സർക്കാരിന്റെ ദേശീയ വികസന ഏജൻസിയുടെ പുനർജീവനവും, സാമൂഹ്യവികസവും എന്ന വിഭാഗത്തിൽ ആലപ്പുഴയുടെ മദർ തെരേസ സിസ്റ്റർ ലിൻഡ ജോസഫിനെ “ഭാരത് സേവക”പുരസ്‌കാരം നൽകി ആദരിച്ചു.

ഭിന്നശേഷിക്കാരായ കുട്ടികൾക്കായി ആലപ്പുഴ രൂപതയുടെ കീഴിൽ പ്രവർത്തിക്കുന്ന സ്വാന്ത്വൻ സ്പെഷ്യൽ സ്കൂൾ പ്രിൻസിപ്പളായി സേവനം അനുഷ്ട്ടിച്ചു വരുന്ന വിസിറ്റേഷൻ സന്ന്യാസിനീ സമൂഹാംഗമായ സിസ്റ്റർ ലിൻഡ ആലപ്പുഴ രൂപതയിലെ മനക്കോടം സെന്റ് ജോർജ് ഫെറോന ഇടവകാംഗമാണ്.

ബി.എഡ്. ബിരുദധാരിയായ സിസ്റ്റർ ലിൻഡ ഭിന്നശേഷിക്കാരായ കുട്ടികളെ പഠിപ്പിക്കുന്നതിനുള്ള പ്രത്യേക പരിശീലനവും നേടിയിട്ടുണ്ട്. വിസിറ്റേഷൻ ഓൾഡ് ഏജ് ഹോം കൊച്ചി, നോർത്ത് ഇന്ത്യയിൽ അധ്യാപിക, ആലപ്പുഴ സെന്റ് മേരീസ് ഇംഗ്ലീഷ് മീഡിയം സ്കൂൾ അധ്യാപിക, തുടങ്ങിയ മേഖലകളിൽ പ്രവർത്തിച്ചിട്ടുണ്ട്.

നിസ്വാർത്ഥ സേവനത്തിന്റെ അംഗീകാരമായി സംസ്ഥാന, ദേശീയ തലത്തിൽ നിരവധി പുരസ്‌കാരങ്ങൾ ലഭിച്ചിട്ടുണ്ട്.