ഷെറി ജെ.തോമസ്

എറണാകുളം: കേരള ലാറ്റിന്‍ കാത്തലിക് അസോസിയേഷന്‍ സ്ഥാപക ജനറല്‍ സെക്രട്ടറി ഡോ.ഇ.പി.ആന്റെണിയുടെ അനുസ്മരണ സമ്മേളനം ഫെബ്രുവരി 26 ബുധനാഴ്ച വൈകിട്ട് 4 മണിക്ക് എറണാകുളം ആശീര്‍ഭവനില്‍ പ്രതിപക്ഷ നേതാവ് രമേശ് ചെന്നിത്തല ഉദ്ഘാടനം ചെയ്യും. കോട്ടപ്പുറം ബിഷപ്പ് ജോസഫ് കാരിക്കശേരി അധ്യക്ഷത വഹിക്കും. വിവിധ രാഷ്ട്രീയ സാമൂഹ്യ സാമുദായിക നേതാക്കള്‍ ഇ.പി.ആന്റെണിയെ അനുസ്മരിച്ച് സംസാരിക്കും.

ഇന്‍ഡ്യന്‍ വ്യാമസേനയില്‍ വൈമാനികനായിരുന്ന ആന്റെണി 1964-ല്‍ കളമശ്ശേരി സെന്റ് പോള്‍സ് കോളെജില്‍ ചരിത്രാദ്ധ്യാപകനായും, വൈസ് പ്രിന്‍സിപ്പലായും സേവനം ചെയ്തു. 1975 മുതല്‍ ആറു വര്‍ഷം കേരള പബ്ലിക് സര്‍വ്വീസ് കമ്മീഷന്‍ അംഗമായിരുന്നു. 1967-ല്‍ വരാപ്പുഴ അതിരൂപത കാത്തലിക് അസോസിയേഷന് രൂപം കൊടുക്കാൻ നേതൃത്വം നൽകി. 1972-ല്‍ ഷെവലിയര്‍ കെ.ജെ.ബര്‍ലി, ഫാ.ജോര്‍ജ് വെളിപ്പറമ്പില്‍ എന്നിവര്‍ക്കൊപ്പം കെ.എല്‍.സി.എ.യ്ക്ക് രൂപം നൽകി.

1972-ല്‍ കേരള സര്‍ക്കാര്‍ കേരളത്തിലെ ന്യൂനപക്ഷ കോളെജുകളെ ദേശസാല്‍ക്കരിക്കാന്‍ ശ്രമിച്ചപ്പോള്‍ പ്രക്ഷോഭം നയിക്കുന്നതില്‍ ഡോ.ആന്റെണി മുന്‍നിരയില്‍ നിന്നു. 1974-ല്‍ കേരള പിന്നോക്ക സമുദായ ഫെഡറേഷന്‍ രൂപീകരിച്ചു. എസ്.എന്‍.ഡി.പി., മുസ്ലിം ലീഗ്, കെ.എല്‍.സി.എ. ഉള്‍പ്പടെ കേരളത്തിലെ സംവരണ സമുദായങ്ങളിലെ 33 സംഘടനകളുടെ ഫെഡറേഷനായിരുന്നു ഇത്. എസ്.എന്‍.ഡി.പി. പ്രസിഡന്റ് ഡോ. കെ.കെ.രാഘവന്‍ പ്രസിഡണ്ടും, ഡോ.ഇ.പി.ആന്റെണി ജനറല്‍ സെക്രട്ടറിയുമായിരുന്നു.