സ്വന്തം ലേഖകൻ

എറണാകുളം: I can’t breath എന്ന പേരിൽ പേരിൽ സംഗീത വിദ്യാർഥികളായ ഫാ.ജാക്‌സൺ കിഴവനയും, ഫാ.ജെറിൻ പാലത്തിങ്കലും ചേർന്നൊരുക്കിയ ആൽബം വംശീയതക്കെതിരെയുള്ള സമൂഹമനസാക്ഷിയുടെ പ്രതിഷേധമാവുകയാണ്. ‘ജാക്സൺ സേവ്യർ’ എന്ന യൂട്യൂബ് ചാനലിലൂടെയാണ് ഈ ഗാനം ജനങ്ങളിലേക്ക് എത്തിയിരിക്കുന്നത്.

മെയ് 25-ന് അമേരിക്കയിലെ മിനസോട്ടയിൽ കൊല്ലപ്പെട്ട ജോർജ് ഫ്ലോയ്ഡ് എന്ന വ്യക്തിയുടെ വേദന ഹൃദയത്തെ ഞെരുക്കിയ നിമിഷങ്ങളുടെ ബാക്കിപത്രമാണ് ഈ ഗാനം എന്നാണ് ഇവർ പറയുന്നത്. ഫാ.ജാക്‌സൺ കിഴവനയും, ഫാ.ജെറിൻ പാലത്തിങ്കലും ചേർന്ന് ചിട്ടപ്പെടുത്തിയ ഗാനം ഫാ.കോറോത്ത് ജേക്കബാണ് എഡിറ്റ് ചെയ്തിരിക്കുന്നത്. ഇവർ മൂന്നുപേരും എറണാകുളം-അങ്കമാലി അതിരൂപതയിലെ വൈദികരാണ്.

സാമൂഹിക പ്രതിബദ്ധത യോടൊപ്പം തന്നെ കലാ മൂല്യത്തിന് വളരെ പ്രാധാന്യം നൽകിയാണ് ഈ ഗാനത്തിന്റെ കമ്പോസിഷൻ നടത്തിയിരിക്കുന്നത്. ‘ബ്ലൂസ്’ പ്രോഗ്രഷനിൽ ‘റെഗ്ഗെ’ റിഥം സമ്മേളിക്കുന്ന രീതിയിലാണ് കമ്പോസിഷൻ. ഈ രണ്ടു സങ്കേതങ്ങളും ഉപയോഗിക്കാൻ കാരണമുണ്ട്. ബ്ലൂസ് 1870-കളിൽ ആഫ്രോ-അമേരിക്കൻ ഇടങ്ങളിൽ രൂപപ്പെട്ടതാണ്. ‘Stories’ നെകാൾ വികാരങ്ങൾക്ക് പ്രാധാന്യം കൊടുക്കുന്നതാണ് പ്രത്യേകിച്ച് ‘ഏകാകിത’ അവതരിപ്പിക്കുന്നതാണ് ബ്ലൂസ് കോമ്പോസിഷൻ. എന്നാൽ 1960-കളിൽ ജമൈക്കയിൽ രൂപപ്പെട്ടതാണ് റെഗ്ഗെ. ഓഫ് ബീറ്റ് സ്വഭാവമുള്ള ഈ സങ്കേതത്തിൽ അടിച്ചമർത്തപ്പെട്ടവരുടെ പ്രതിഷേധ ഭാവമാണ് പ്രധാനം. കൊല്ലപ്പെട്ട വ്യക്തിയുടെ സാംസ്കാരിക പശ്ചാത്തലത്തോട് ചേർന്നിരിക്കുന്നു എന്നതാണ് ഈ ഗാനത്തെ പ്രത്യേകതയുള്ളതാക്കുന്നത്.

Falsetto എന്ന വോക്കൽ ടെക്നിക്കും ഈ ഗാനത്തിൽ ഉപയോഗപ്പെടുത്തിയിട്ടുണ്ട്. സാധാരണ ശബ്ദ പരിധിക്ക് പുറത്ത് പാടേണ്ടി വരുമ്പോൾ ഗായകർ ഈ ടെക്നിക് ഉൾപ്പെടുത്താറുണ്ട് എന്നതാണ് പ്രത്യേകത. ജോർജ് ഫ്ലോയ്ഡ് മരണത്തോട് അനുബന്ധിച്ച് അമേരിക്കയിലും മറ്റെല്ലാ രാജ്യങ്ങളിലും പ്രതിഷേധം ഇരമ്പുന്ന ഈ സമയത്ത് വൈദികരുടെ ഈ ഗാനാവതരണത്തിന് പ്രത്യേക പ്രാധാന്യമുണ്ട്. ജോർജ് ഫ്ലോയ്ഡിന്റെ മരണത്തോടനുബന്ധിച്ചുള്ള ഫ്രാൻസിസ് പാപ്പയുടെ വീഡിയോ വിചിന്തനവും ഈ ആൽബത്തിൽ ഉൾച്ചേർത്തിട്ടുണ്ട്.

വിയന്ന യൂണിവേഴ്സിറ്റിയിൽ ‘കോറൽ കണ്ടെക്‌ടിങ് ൽ’ മാസ്റ്റേഴ്സ് ചെയ്യുന്ന ഫാ.ജാക്‌സൺ കിഴവനയും, ‘ദ്‌ ബാംഗ്ലൂർ കൺസർവേറ്ററിയിൽ’ മാസ്റ്റേഴ്സ് ചെയ്യുന്ന ഫാ.ജെറിനും മുൻപും ഇത്തരത്തിൽ കാലിക പ്രാധാന്യമുള്ള സംഗീതാവിഷ്കാരങ്ങൾ നടത്തിയിട്ടുണ്ട്.