സ്വന്തം ലേഖകൻ

മാവേലിക്കര: പരിശുദ്ധ കന്യകാമറിയത്തിന്റെ ജന്മദിനത്തിൽ പരിശുദ്ധ കന്യകാമറിയത്തിന്റെ തിരുസ്വരൂപവും സൈക്കളിൽ വഹിച്ച് ഇടവക ചുറ്റിയ വൈദീകൻ ശ്രദ്ധയാകർഷിക്കുന്നു. കൊല്ലം രൂപതയിലെ ഫാ.റെജിസൺ റിച്ചാർഡാണ് പരിശുദ്ധ കന്യകാമറിയത്തിന്റെ ജനന തിരുനാളായ സെപ്റ്റംബർ എട്ടാം തീയതി, പരിശുദ്ധ കന്യകാമറിയത്തിന്റെ തിരുസ്വരൂപം തന്റെ സൈക്കിളിൽ വഹിച്ചുകൊണ്ട് ഇടവകയിലെ റോഡുകളിലൂടെ പ്രാർത്ഥനാപൂർവ്വം കടന്നുപോയത്.

മാവേലിക്കര, സെന്റ് സെബാസ്റ്റ്യൻസ് ദേവാലയം വലിയപെരുമ്പുഴയിലെ വികാരിയച്ചനാണ് തന്റെ ഇടവക ജനത്തിന് പരിശുദ്ധ കന്യകാമാതാവിന്റെ ജനനത്തിരുനാൾ കൂടുതൽ അർത്ഥവത്താക്കുവാൻ പള്ളിയിലെ തിരുസ്വരൂപവുമായി അവരുടെ ഇടങ്ങളിലേക്ക് പോയത്. കൊറോണാക്കാലമായതിനാൽ സെപ്റ്റംബർ 8-ന് ദേവാലയങ്ങളിലെത്തി തിരുക്കർമ്മങ്ങളിൽ പങ്കെടുക്കാൻ സാധിക്കാത്ത അനേകർക്ക് ഇത് വലിയ അനുഗ്രഹമായി മാറിയെന്നും, പരിശുദ്ധ അമ്മ ഞങ്ങളെ തേടി ഞങ്ങളുടെ ഭവനങ്ങളിലൂടെ കടന്നുപോയ അനുഭവമാണ് ഉണ്ടായതെന്നും വിശ്വാസികൾ പറഞ്ഞു.