ജോസ് മാർട്ടിൻ

ആലപ്പുഴ: പെട്രോളിനും ഡീസലിനും അന്യായമായി വില വർദ്ധിപ്പിച്ചു കൊണ്ടിരിക്കുന്നതിൽ പ്രതിഷേധിച്ച് ആലപ്പുഴ രൂപതാ കെ.എൽ.സി.എ. ആലപ്പുഴ ഹെഡ് പോസ്റ്റ് ഓഫീസിലേക്ക് മാർച്ചും ധർണയും നടത്തി. ആലപ്പുഴ രൂപതാ സോഷ്യൽ സർവീസ് സൊസൈറ്റി എക്സിക്യൂട്ടീവ് ഡയറക്ടർ ഫാ.സേവ്യർ കുടിയാംശ്ശേരി ധർണ ഉദ്ഘാടനം ചെയ്തു.

ഇന്ധന വില കൂട്ടാനുള്ള അധികാരം കമ്പനികൾക്ക് പൂർണ്ണമായി വിട്ടുകൊടുത്തതോടെ അവർക്ക് തോന്നുന്നതുപോലെ നിത്യവും വില കൂട്ടുകയാണ്. കഴിഞ്ഞ 17 ദിവസങ്ങളായി തുടർച്ചയായി ദിവസവും 50 പൈസ 60 പൈസ അല്ലെങ്കിൽ ഒരു രൂപ വരെ കൂട്ടി, ഇതുവരെ പത്തോ പതിനഞ്ചോ രൂപയോളം വർദ്ധിപ്പിച്ചു. പെട്രോളിന്റെ വിലയാണ് ഇവിടത്തെ മൊത്തം സാമ്പത്തിക അവസ്ഥയെ നിയന്ത്രിക്കുന്നത്. പെട്രോളിന് വില കൂടിയാൽ എല്ലാത്തിനും വില കൂടും എന്നത് എല്ലാവർക്കും അറിയാവുന്ന കാര്യമാണെന്നും, ഈ സാഹചര്യത്തിൽ അനന്യമായ വിലകൂട്ടൽ രാജ്യത്ത് ഉണ്ടാക്കാവുന്ന പ്രത്യാഘാതത്തെക്കുറിച്ച് കേന്ദ്രസർക്കാർ ഗൗരവപൂർവം ചിന്തിക്കേണ്ടതാണെന്നും ഫാ.സേവ്യർ കുടിയാംശ്ശേരി പറഞ്ഞു.

ആലപ്പുഴ വഴി ചേരി ഇംഗ്ഷനിൽ നിന്നാരംഭിച്ച മാർച്ച് മുൻ രൂപതാ പ്രസിഡന്റ് ക്ലീറ്റസ് കളത്തിൽ ഉദ്ഘാടനം ചെയ്തു. രൂപത പ്രസിഡന്റ് പി.ജി.ജോൺ ബ്രിട്ടോ അധ്യക്ഷത വഹിച്ചു. വൈസ്പ്രസിഡന്റുമാരായ ഹെലൻ ഏവ് ദേവൂസ്, സാബൂ വി.തോമസ്, ജനറൽ സെക്രട്ടറി ഇ.വി.രാജു, തോമസ് കണ്ടത്തിൽ, തങ്കച്ചൻ, സോളമൻ പനയ്ക്കൽ, ആൻഡ്രൂസ്, ആൽബർട്ട് പുത്തൻ പുരയ്ക്കൽ, സോണി, പ്രവീൺ, സോളമൻ പഴമ്പാശ്ശേരി തുടങ്ങിയവർ പ്രസംഗിച്ചു.