ശശികുമാർ, നിഡ്സ്

നെയ്യാറ്റിൻകര: കോവിഡ് 19-ന്റെ പശ്ചാത്തലത്തിൽ, നെയ്യാറ്റിൻകര ഇന്റഗ്രൽ ഡവലപ്മെന്റ് സൊസൈറ്റി (NIDS) യുടെ നേതൃത്വത്തിൽ നെയ്യാറ്റിൻകര, കാട്ടാക്കട, നെടുമങ്ങാട് താലൂക്കുകളിലെ നിർദ്ധനരായ കുടുംബങ്ങൾക്കായി ഒരു മാസത്തേക്കുള്ള ഭക്ഷ്യ ധാന്യ കിറ്റ് വിതരണോത്ഘാടനം ഇന്ന് (17-08-2020) നെയ്യാറ്റിൻകര ലത്തീൻ രൂപത ബിഷപ് അഭിവന്ദ്യ വിൻസന്റ് സാമുവൽ പിതാവ് നിർവ്വഹിച്ചു.

കോവിഡ് 19 മഹാമാരി നമ്മുടെ കൊച്ചു കേരളത്തിലും ഭക്ഷണ ദാരിദ്ര്യം കൊണ്ടുവരുന്നുവെന്നും, വിവിധ മേഖലകളിൽ നമ്മുടെ നാട് സമ്പന്നമാണെങ്കിലും പലരീതിയിലുള്ള ചൂഷണത്തിന് വിധേയമാകുന്നതിനാൽ പാവപ്പെട്ടവരും അനുദിന അന്നത്തിനായി അദ്ധ്വാനിക്കുന്നവരും ആഹാരത്തിനായി കഷ്ടപ്പെടുന്നുണ്ടെന്നും, നമ്മുടെ ചുറ്റുപാടിലുള്ള അത്തരക്കാരെ കണ്ടെത്തി സഹായിക്കേണ്ടത് നമ്മുടെ ഉത്തരവാദിത്വമാണെന്നും ബിഷപ്പ് ഓർമ്മിപ്പിച്ചു.

രൂപത വികാരി ജനറൽ മോൺ.ജി.ക്രിസ്തുദാസ് അദ്ധ്യക്ഷത വഹിച്ച യോഗത്തിൽ നിഡ്സ് ഡയറക്ടർ ഫാ.രാഹുൽ ബി.ആന്റോ അനുഗ്രഹ പ്രഭാക്ഷണം നടത്തി. രൂപതയിലെ 11 മേഖലകളിലെയും നിഡ്സ് യൂണിറ്റുകളിൽ നിന്നും തിരഞ്ഞെടുത്ത 550 കുടുംബങ്ങൾക്കാണ് ഈ പദ്ധതിയിലൂടെ സഹായം ലഭ്യമാക്കുന്നത്.