ദേശീയ ജപമാല റാലിക്ക് നെയ്യാറ്റിന്‍കരയില്‍ തുടക്കമായി
വിവിധ സംസ്ഥാനങ്ങളില്‍ പര്യടനം നടത്തുന്ന റാലി ഒക്ടോബര്‍ 31 ന് ഡല്‍ഹിയില്‍ സമാപിക്കും...
അനില്‍ ജോസഫ്
നെയ്യാറ്റിന്‍കര: ദേശീയ കരിസ്മാറ്റിക് സംഘടനയായ കാരിസ് നാഷണല്‍ സര്‍വ്വീസ് ഓഫ് കമ്മ്യൂണിയനും കേരളാ കാരിസ് സര്‍വ്വീസ് ഓഫ് കമ്മ്യൂണ്യനും സംയുക്തമായി സംഘടിപ്പിക്കുന്ന ദേശിയ ജപമാല റാലിക്ക് നെയ്യാറ്റിന്‍കരയില്‍ തുടക്കമായി.
നെയ്യാറ്റിന്‍കര പത്താംങ്കല്ല് തിരുഹൃദയ ദേവാലയത്തില്‍ നടന്ന ഉദ്ഘാടന പരിപാടി നെയ്യാറ്റിന്‍കര രൂപതാ ബിഷപ് ഡോ.വിന്‍സെന്‍റ് സാമുവല്‍ ഉദ്ഘാടനം ചെയ്യ്തു. കരിസ്മാറ്റിക് പ്രസ്ഥാനങ്ങള്‍ കോവിഡ് കാലത്ത് വിശ്വാസ നവീകരണത്തിന് നിസ്തുലമായ പങ്ക് വഹിച്ചെന്ന് ജപമാലറാലി ഉദ്ഘാടനം ചെയ്യ്ത് ബിഷപ് പറഞ്ഞു.
മൂന്ന് ദിവസം കേരളത്തിലെ വിവിധ രൂപതകളില്‍ പര്യടനം നടത്തുന്ന റാലി ഒക്ടോബര്‍ അവസാനത്തോടെ ജമ്മുകാശ്മീരിലെത്തും ഒക്ടോബര്‍ 31 ന് ഡല്‍ഹിയിലെ ജീവന്‍ജ്യോതി റിട്രീറ്റ് സെന്‍ററിലാണ് ദേശീയ ജപമാല റാലിയുടെ സമാപനം.
റാലിയുടെ ആരംഭത്തിന് മുന്നോടിയായി നടന്ന ദിവ്യബലിക്ക് കെസിഎസ്സി നെയ്യാറ്റിന്‍കര റീജിയന്‍ കോ ഓഡിനേറ്റര്‍ ഫാ.ജറാള്‍ഡ് മത്യാസ് മുഖ്യ കാര്‍മ്മികത്വം വഹിച്ചു. കെസിഎസ്സി മെമ്പര്‍ ഫാ.എല്‍ക്കില്‍ ജോസഫ്, നെയ്യാറ്റിന്‍കര രൂപത ശുശ്രൂഷ കോ ഓഡിനേറ്റര്‍ മോണ്‍. വിപി ജോസ്, നെയ്യാറ്റിന്‍കര രൂപത പാസ്റ്ററല്‍ മിനിസ്ട്രി ഡയറക്ടര്‍ ഫാ.ജോയി സാബു, കെസിഎസ് കോ ഓഡിനേറ്റര്‍ സെബാസ്റ്റ്യന്‍ താന്നിക്കല്‍, സുരേഷ് ബാബു, വല്‍സലന്‍ തുടങ്ങിയവര്‍ പ്രസംഗിച്ചു.
