മരക്കുരിശ്‌ തകര്‍ത്ത സംഭവം ; മുഖ്യമന്ത്രിക്കും വനം മന്ത്രിക്കും നെയ്യാറ്റിന്‍കര രൂപത പരാതി നല്‍കി
മരക്കുരിശ്‌ തകര്‍ത്ത സംഭവം ; മുഖ്യമന്ത്രിക്കും വനം മന്ത്രിക്കും നെയ്യാറ്റിന്‍കര രൂപത പരാതി നല്‍കി
നെയ്യാറ്റിന്‍കര ; ബോണക്കാട് കുരിശുമലയില്‍ വനം വകുപ്പ്‌ മന്ത്രിയുടെ നിര്‍ദേശത്തെത്തുടര്‍ന്ന്‌ സ്‌ഥാപിച്ച മരക്കുരിശ്‌ തകര്‍ത്ത സംഭവത്തില്‍ മുഖ്യമന്ത്രിക്ക്‌ പരാതി നല്‍കി . മുഖ്യമന്ത്രിയെക്കൂടാതെ വനംവകുപ്പ്‌ മന്ത്രി , ഡിജിപി , സിസിഎഫ്‌, ഡിഎഫ്‌ഓ, നെടുമങ്ങാട്‌ ഡിവൈഎസ്‌പി തുടങ്ങിയവര്‍ക്കും പരാതി നല്‍കിയിട്ടുണ്ട്‌.
നെയ്യാറ്റിന്‍കര ബിഷപ്‌സ്‌ ഹൗസില്‍ ചേര്‍ന്ന അടിയന്തര യോഗമാണ്‌ തീരുമാനങ്ങള്‍ എടുത്തത്‌. കഴിഞ്ഞ ഓഗസ്റ്റില്‍ ബോണക്കാട് കുരിശും അള്‍ത്താരയും തകര്‍ത്തവര്‍ക്കെതിരെ രൂപത പരാതി നല്‍കിയിരുന്നെങ്കിലും നടപടി സ്വീകരിച്ചിട്ടില്ലെന്നും നെയ്യാറ്റിൻകര രൂപതയുടെ പ്രധാന തീര്‍ഥാടന കേന്ദ്രങ്ങളിലൊന്നായ ബോണക്കാട് കുരിശുമലക്കെതിരെ വനം വകുപ്പ്‌ മേധാവികളുടെ ഒത്താശയോടെ സാമൂഹ്യവിരുദ്ധര്‍ അടിക്കടി നടത്തുന്ന ആക്രമണങ്ങളില്‍ നടപടി വേണമെന്നും പരാതിയില്‍ ആവശ്യപ്പെട്ടിട്ടുണ്ട്‌.
ബിഷപ്‌സ്‌ ഹൗസില്‍ ചേര്‍ന്ന യോഗത്തില്‍ മോണ്‍.ജി.ക്രിസ്‌തുദാസ്‌ അധ്യക്ഷത വഹിച്ചു. മോണ്‍.റൂഫസ്‌പയസ്‌ലിന്‍, മോണ്‍.വി.പി ജോസ്, കുരിശുമല റെക്‌ടര്‍ ഫാ.ഡെന്നിസ്‌മണ്ണൂര്‍ , ഫാ.ഷാജ്‌കുമാര്‍, കെഎല്‍സിഎ രൂപതാ പ്രസിഡന്റ്‌ ഡി.രാജു, അല്‍ഫോണ്‍സാ ആല്‍റ്റിസ്‌ തുടങ്ങിയവര്‍ പ്രസംഗിച്ചു.
